fbpx

“Kya be Chhakke”, “Oye Gud”…. Kitne samany hain yeh shabd hamare samaaj mein. Khaas kar LGBTIQ samaaj to in saare shabdonse achhese wakif hain. Train se safar karte waqt is biradari ke log hume aksar nazar aate hain. Mumbai ke local train mein duwaayen dekar bhikh maangate dikh jaana to aam baat hain. Unhe dekhkar dil me yahi ek khayal aata hain ki kya yeh log apna gujara puri zindagi sirf bhikh maangkar hi karenge. Badkismatee se abhi ke haalat dekhkar to jawab “HAAN” hi lagata hain…

Shadi ho ya naye bachche ke janam ki khushi, in logon ka aana hume shubh shakun lagta hain. In logon ki duwaayen kabhi khaali nahi jaati, in mein sachchai hoti hain aisa hamara manana hain. Ranbirangi saariyaan pahne, gale me bahut saare jewar sajaae, fulonse bhara baalonka juda banakar jab hamare khushi ke mauke par yeh log aate hain to hume ek vishwas ho jaata hain ki inki duwaayen saari buri balaayen jarur bhaga degi.

Par in maukon ke alawa humne kabhi socha hain ki in kinnaron ki zindagi kaisi hogi? Kin mushkilon ka saamana karke yeh log apni zindagi jeete honge? Logon se milne wali nafrat sehan kar kaise har din guzaarte honge? Nahi…. Hamare jehan me yeh khayaal kabhi nahi aata. Inki yaad to tab hi aati hain jab kisi mard ke mardanagi par sawal uthte hain. Uske namardanagi ko sambodhit karne ke liye hum unhe “Hijra” ya “Chhakka” kahkar bulate hain. Kya sach me is biradari ke log namard hain???? Mere khayal to jawaab “NAA” hi hoga. Aaj bhi Mardanagi ki vyakhya mard ke usi ang se Jodi jaati hain jisse woh naye janam ka ek karan maatr ban jaata hain. Aur jo ise pura nahi kar paata unhe hum in namardangi wale shabdonse pukarane lagte hain.

Asali mardangee ke udaharan to yeh log hain, jo itna sab kuchh sahankar hamesha muskuraate hue duwaayen dene aate hain. Bhikh maangana in logonki majburi to hamaare wajah se hain, kyonki inse dua to lena chahte hain par apnana nahi chahte hain. Hamare uchchbhru samaaj se inhe alag hi rakhna chahte hain. Fir bhi in nafraton ko paar kar aaj inhi me se kuchh logo ne apna alag mukaam banaya hain.

“Laxmi Narayan Tripathi” jo pahali vyakti hain Hijra samaj se jinho ne first time 2008 me Asia Pacific ka UN me pratinidhattv kiya tha. Iske alawa woh ek Hindi film abhinetri aur Bharatnatyam adakara hain. Inki Bahut saari kitaben prakashit ho chuki hain. Gauri Sawant ko kaun nahi jaanta… Vicks ke vigyapan se unhone samaaj me ek alag pahchaan banayi hain. Maharahtra ke chunaav aayog ki Sadbhavana doot (Goodwill Ambassador) rah chuki Gauri Sawant “Sakshi Char Chaughi” sanstha ki sanchalak bhi hain. Yeh sanstha Transgender log aur jo HIV/AIDS se badhit hain unke sahkarya mein karyarat hain.

Inke alawa K Prithika Yashini (Bharat ki pahali Transgender Police Officer), Madhu Bai Kinnar (Bharat ki pahali Dalit Transgender mayor), Manabi Bandopadhyay (Bharat ki Pahali Transgender Principal), Padmini Prakash (Bharat ki Pahali News Anchor) in jaise kai logo ne apna alag mukaam haasil kiya hain. Bharat sarkar ne bhi is teesare ling ko maanyata dekar inke ujjwal bhavishya ke dwaar khol diye hain. Bass… Abhi jarurat hain ke bharat ke logo ne inhe apnane ki, taaki yeh log bhi kandhe se kandha milakr bharat ki pragati me apna yogdaan de sake…. Aakhir me inki bhawanaon ko samzane ke liye bas itna kahunga

“Mat pahchaano mujhe mere libaas se . Mere dil me jhaank kar dekhoge …To jaanoge mujhko….”

This post is submitted by one of our well-wishers. If you have something interesting to share about your life , Your coming out story , you ally who you love etc , write to us here and we shall make you famous